BIBLIOTECA DOS PAPALIBROS - CEIP de Parga

Dende o 2 ata o 13 de xuño podedes visitar na Casa Habanera de Guitiriz unha exposición de traballos diversos dalgúns dos centros da comarca da Terra Cha, que vimos tecendo redes e traballando en conxunto, coa ansia de mellorar e optimizar a nosa labor educativa, procurando xerar un impacto maior e de máis calidade na nosa contorna. A achega do noso cole consiste nun mapa interactivo onde poderás escoitar algúns contos tradicionais da zona, contados polo noso alumnado.

Este fin de semana pasado,  celebramos as nosas Letras cunha foliada aberta na que tivemos diversión, alegría, música en galego, boa compañía e un excelente ambiente. Non facemos festas só porque nos gusten (que tamén nos gustan 😉). Facémolas porque temos a ilusión de ser un cole do seu pobo, porque queremos que o pobo sinta coma del o seu cole. Porque a través delas creamos vínculos, espallamos a nosa cultura e creamos unha conexión entre a comunidade que seguro nos axudará a aprender a remar xuntxs polos moitos retos que nos unen.

Durante este curso estamos comezando a traballar no proxecto de Patios Dinámicos de @geylagar , un traballo a longo prazo que ten por obxectivo explorar todas as potencialidades dos recreos como espazos de diversión, socialización e aprendizaxe, procurando que todos/as os nenos e nenas gocen plenamente do lecer. Ademais de ofrecer xogos variados e de que os mestres/as actúen como dinamizadores/as do xogo, outra das características esenciais do proxecto é a mellora e diversificación dos espazos. Deseñar lugares acolledores, que nos axuden a desenvolvernos, a xogar, a socializar, a crear ou a imaxinar. De aí esta nova casiña. O "non lugar", se tomamos a tradución literal do grego antigo do que provén a palabra utopía. Un lugar que non existe, pero que imaxinamos, que soñamos, para poder ser felices mentres intentamos chegar a el. O fogar da utopía.